Xəbər lenti

 Şrift:


                              Xəyalə SEVİL


Bir bəhanə tap, zəng elə
 
Heç kim
Məni səndən soruşmayacaq.
Nə də heç kim səni məndən.
Nə gözəl ayrılıq oldu.
Dərdi yığdım gözlərimə,
Yanaqlarım qayıq oldu...
Əllərimdən soruşuram
Səni tez-tez,
Gözlərimdən tökülürsən.
Eh! Yenə də bir yol tapıb,
Ürəyimə çəkilirsən.
Elə gücüm də yoxdu,
Ürəyimi bədənimdən yıxam ki...
Bir bəhanə tap, zəng elə,
Elə darıxıram ki...

 
Qayıdaq
 
Qayıdaq taa əvvələ,
Ta o günə qayıdaq.
Mən ona,
Sən özünə -
Bəs biz kimə qayıdaq?!
... Üzün hayana dönsə də,
Yolun ömrümdən düşəcək.
Şəkilçəkən gözlərində
Yanaqlarım nəm düşəcək.
Nə getməklə getmək oldu,
Nə qalmaq xeyir eylədi.
Sənin sevgin...
Mənim sevgim...
Üst-üstə şeir eylədi.

 
Sən məni unutdun axı
 
Sən məni unutdun axı,
Belə asan, belə sadə,
Elə bircə kəlməylə,
“ Get, bir daha gəlməylə ”
 
Məndən gedən ölmür ki,
Məndən can alıb gedir.
Yüz il yaşayacaqsan.
Ömrümdən yol üstü keçən,
Mənə son dayanacaqsan.
 
Əllərim bədənimin
Qapısıdır, bağladım.
Nə ev qaldı, nə ocaq.
Arxanda iz buraxdın.
Öldürdüyün arzular,
Gözümdə tapılacaq.

 
Səni hər gün öldürürəm
 
Gözüm açıq qalıb sənə,
Gözümü qarət edirəm.
Öldürüb ümidlərimi,
Sonra ziyarət edirəm.
 
Susub atdım dodağımdan,
Kiçiltdim içimdə səni.
Həzin bir xatirə kimi,
Gətirdim köçümdə səni.
 
 Heçmi sevmədin məni?...
Əlim üzümün yasında.
Səni hər gün öldürürəm,
Başqasında... Başqasınada...

 
Bilirsənmi?
 
Birirsənmi?
Səndən qalan günlərimin
Yox mənası, yox adı.
Allı-güllü xəyallar da
Sənsiz uçuq daxmadı.
 
İndi cavan bədəndə
Qocalmış ömür-günəm.
Alnımın yazısına
Göndərilmiş sürgünəm.
 
Səni seçibdi deyə,
Bədənimdən qovduğum
Ürəyimin üzünə də baxmıram.
...Aldadıram özümü
Guya ki, darıxmıram.
Evimi də dəyişdim
 
Evimi də dəyişdim.
İndi başqa pəncərədən baxıram
Günəşin qırmızı-qırmızı gülümsəməsinə.
Hər şey eyni...
Hər şey bir yana, tanrı,
Mən indi necə baxım,
Hər gün sənə açdığım
Əllərimin üzünə?!
Bu gün də belə keçəcək,
Yenə səhər açılacaq.
Təbəssümlər yerləşəcək
Kirayə yanaqlarıma,
Üzüm, müvəqqəti sığınacaq yeri.
Qara çərçivədi ömür dediyin,
Səssizcə dolduraq
Dörd bucaq yeri...
O vaxt anam danışmışdı,
Sonra filmlərdə gördüm
O mən deyən sevgini.
Həvəs etdim,
Ümid etdim,
Xəyal etdim,
Heyif!!!

 
Gözlərim dar ağacıdı
 
Səndən də döndüm, axır ki,
Qürurumu ağ saxladım.
Ağlamağa səssiz bir yer,
Yazmağa varağ saxladım.
 
Atdım gözümün yaşına,
Ömrümü islatdım suda.
Bədən ruhun vətəniymiş,
Vətənsiz qaçqınmış o da.
 
Səndə nəyim qaldı mənim,
Ruhmu? Halal xoşun olsun.
Təzə ömründə, günündə
Qoy bir də nimdaşın olsun.
 
İndi bütün xatirələr,
Gözümdən doğulub düşür.
Gözlərim dar ağacıdı,
Göz yaşım boğulub düşür.

 
Hərə bir cür itirir
 
Hərə bir cür itirir,
Mən də bu cür itirdim.
Gözlərim bağlı zirzəmi.
İçəridən həsrət döyür,
İtirdim.
Əcəb ticarət eylədin,
Kiçik verib, böyük aldın bu eşqi.
Sənin dodağında  söz,
Mənim gözümdə su eşqi.
Ayağımın altından
Yolları kim çəkdi mənim?
Yolum bir də boy atmaz.
Qollarım gödəkdi mənim,
Sənə çatmaz...
 

Həyat bu qədər sadə...
 
Bu küçə də
Axırıncı vaqon kimi
Boşaltdı adamlarını.
Və bu gecə də
Qaranlıq qara kəlağayını
Saldı şəhərin boynuna.
Yol boyu uzanan gecə işıqları
Açdı gözlərini.
Külək deyinə-deyinə
Oyatdı yuxudan yarpaqları.
Yəni,
Həyat bu qədər sadə,
Həyat bu qədər təkrar.
Amma ürəyimdə
Təkrarlanmayan biri var.
 

Mən də vəfasız oldum
 
Mən də vəfasız oldum,
Sənə oxşadım bir az.
Yaman zildən sevirdim,
Düşmüşəm bəmə bir az.
 
Üst-üstə yığılıb qalıb,
Ayın, ilin uzaqlığı.
Ay üzümün qaralığı,
Ay sevgimin ağlığı.
 
İndi səndən geriyə
Yadımda səsin qalıb.
Duyğularım cılızlaşıb,
Sevgim bir əsim qalıb.
 
Gözümdəki yaş olü
Doğulacaq indicə.
Həsrətin kəndirdədi,
Boğulacaq indicə
 
Submit to DiggSubmit to FacebookSubmit to Google BookmarksSubmit to StumbleuponSubmit to TechnoratiSubmit to TwitterSubmit to LinkedIn

Şərh yaz


Təhlükəsizlik kodu
Yenilə

Sayğac